Në Vlorë, 18 pika karburanti dhe 51 lavazhe kanë punuar pa licencat e autorizimet e kërkuara nga ligji, ndërsa bashkia nuk ka ndërmarrë masat e duhura. Kjo del nga raporti përfundimtar i Kontrollit të Lartë të Shtetit për auditimin e Bashkisë Vlorë për vitin 2025.
Sipas KLSH-së, nga 40 subjekte që tregtonin karburante me pakicë, 18 rezultuan pa licencë. Mungesa e tarifave të licencimit ka sjellë 18 milionë lekë të ardhura të munguara për buxhetin vendor. Bashkia nuk kishte dokumentuar që të kishte njoftuar Inspektoratin Shtetëror Teknik Industrial për bllokimin e këtyre subjekteve. Për katër pika karburanti të identifikuara nga të dhënat e institucioneve të tjera shtetërore, drejtoria përgjegjëse e bashkisë nuk kishte informacionin dhe dokumentacionin përkatës.
Më e rëndë paraqitet situata te lavazhet. Auditimi ka konstatuar se 51 subjekte ushtronin aktivitet si lavazhe gjatë vitit 2025, por asnjëri nuk kishte autorizimin e bashkisë.
KLSH ka evidentuar parregullsi edhe në ndërtim, ku 46 subjekte kishin kryer punime në territorin e bashkisë pa iu ngarkuar tarifat e pastrimit, ndriçimit dhe gjelbërimit. Në administrimin e plazheve, 13 subjekte me detyrime të papaguara ndaj bashkisë u pajisën sërish me hapësira për stacione plazhi gjatë 2025.
Vetëm nga mungesa e licencimit të 18 pikave të karburantit dhe e autorizimeve për 51 lavazhe, bashkia ka lënë pa mbledhur mbi 18.5 milionë lekë. Në total, sipas KLSH-së, detyrimet e akumuluara nga taksat dhe tarifat vendore ndaj Bashkisë Vlorë arritën në 829.6 milionë lekë në fund të 2025-s, me një rritje prej 10.5 milionë lekësh në krahasim me një vit më parë.
Ndërkohë, qeveria ka përgatitur një paketë të re fiskale për vitin 2027, që parashikon rritje të barrës tatimore dhe kostove për një pjesë të bizneseve dhe qytetarëve. Kritika është se politika fiskale po rëndon më shumë ata që paguajnë rregullisht, në vend që të përqendrohet te informaliteti dhe zgjerimi i bazës së tatimpaguesve. Mosveprimi i institucioneve, theksohet, krijon kushte për konkurrencë të pandershme dhe humbje të të ardhurave publike.
