Linja hekurudhore Tiranë-Durrës-Rinas nuk ka transportuar ende asnjë pasagjer, ndërsa afati për vënien e saj në punë është shtyrë sërish dhe tani synohet për vitin 2027. Në të njëjtën kohë, qeveria ka miratuar Strategjinë Sektoriale të Transportit dhe Planin e Veprimit deri në 2030, që parashikojnë rehabilitimin e linjave ekzistuese, ndërtimin e segmenteve të reja dhe elektrifikimin e rrjetit.
Punimet për linjën Tiranë-Durrës nisën në vitin 2022. Atëherë ish-ministrja e Infrastrukturës, Belinda Balluku, deklaroi se hekurudha do të përfundonte në fillim të 2024. Në ceremoninë e nisjes ishte e pranishme presidentja e Komisionit Europian, Ursula von der Leyen, e cila shprehu habi për afatin e shkurtër.
Afati u zhvendos më pas drejt fundit të 2024, pastaj në 2025 dhe në 2026. Sipas një raportimi të shkurtit 2026, Hekurudha Shqiptare kishte konfirmuar se punimet do të mbaronin në dhjetor 2026, ndërsa testimet dhe nisja e operimit parashikoheshin për tremujorin e parë të 2027.
Në maj 2026, ministri i Infrastrukturës, Enea Karakaçi, pranoi se projekti kishte pësuar vonesa dhe se duheshin plotësuar ende procedurat për elektrifikimin. Në shtator, zëvendësministrja Enkelejda Muçaj e vendosi objektivin e funksionalizimit të linjës dhe të lidhjes me aeroportin në vitin 2027.
Sipas një investigimi të Qendrës Shqiptare për Gazetarinë Cilësore (ACQJ), deri në maj 2026 vlera e investimit dhe e financimeve të lidhura me projektin kishte kaluar 118 milionë euro, pa përfshirë plotësisht kostot përfundimtare të elektrifikimit. Vonesat janë lidhur me shpronësimet, ndryshimet në projekt, ndërtimin e urave dhe stacioneve të reja, si dhe me përfshirjen e elektrifikimit në fazat e mëvonshme.
Më 21 tetor, gjatë protestave studentore, kryeministri Edi Rama paralajmëroi se personat e përfshirë në akte dhune do të regjistroheshin në një listë dhe do t’u kufizohej aksesi në aeroporte, hotele, trena dhe mjete të tjera transporti. Linja Tiranë-Durrës ende nuk funksionon dhe pjesa tjetër e rrjetit nuk ofron shërbim të rregullt kombëtar për udhëtarët.
Strategjia e re parashikon disa projekte të mëdha. Rehabilitimi i linjës Rrogozhinë-Vlorë dhe lidhja me aeroportin e Vlorës kërkojnë 149.6 milionë euro, me zbatim nga 2027 deri në 2031. Rehabilitimi i hekurudhës Rrogozhinë-Pogradec/Rrajcë, deri në kufirin me Maqedoninë e Veriut, vlerësohet 297.55 milionë euro dhe parashikohet për periudhën 2027-2032. Segmenti Durrës-Rrogozhinë ka një investim prej 111.48 milionë eurosh, plus 21.6 milionë për elektrifikimin.
Rehabilitimi i linjës Vorë-Hani i Hotit, për lidhjen me Malin e Zi, parashikohet me 375.77 milionë euro dhe afat 2026-2030, me 71.9 milionë euro shtesë për elektrifikimin. Plani përfshin edhe 74.05 milionë euro për Tiranë-Durrës dhe lidhjen me Rinasin deri në 2028, 30.11 milionë për zgjatjen drejt terminalit të ri të Tiranës, 27.5 milionë për elektrifikimin e linjës Tiranë-Durrës dhe lidhjes me aeroportin, si dhe 29.5 milionë për Porto Romano-Sukth.
Në total, projektet kryesore të rehabilitimit dhe ndërtimit arrijnë rreth 1.07 miliardë euro, ndërsa me investimet e veçanta për elektrifikimin shuma e planifikuar është afërsisht 1.19 miliardë euro.
