Katër regjistra të dhuratave të Kryeministrisë, që mbulojnë periudhën 2013-2026, evidentojnë 753 objekte të marra nga kryeministri Edi Rama dhe qeveria. Dokumentet u sigurua nga BIRN përmes kërkesave për të drejtë informimi, ndërsa numri del pas heqjes së regjistrimeve të përsëritura.
Më 27 shtator, pas kthimit nga Asambleja e Përgjithshme e OKB-së në Nju Jork, Rama publikoi një videomesazh nga aeroporti “Nënë Tereza”. Ai hodhi poshtë akuzat për korrupsion dhe përfitime të paligjshme dhe tha se në Kryeministri ka “një muze të dhuratave që merr kryeministri”. Sipas tij, pushteti nuk është përdorur kurrë “për të dhënë favore të errëta apo për të marrë dhurata të paligjshme”.
Deklarata erdhi pas akuzave publike për një orë të shtrenjtë, që pretendohej se kryeministri e kishte marrë nga persona të lidhur me krimin e organizuar. Rama i mohoi akuzat dhe tha se dhuratat e pranuara gjatë detyrës janë regjistruar si pronë shtetërore.
Dhuruesit janë shënuar vetëm në regjistrin e periudhës 2013-2018. Aty figurojnë Recep Tayyip Erdogan, atëherë kryeministër i Turqisë, me një pjatë me kapak argjendi, dhe presidenti francez François Hollande, me një pjatë argjendi e një gotë me stemën e Francës. Zëvendëspresidenti amerikan i asaj kohe, Joe Biden, është shënuar si dhurues i një ore tavoline të markës Chelsea.
Në listë janë edhe ish-presidenti i Maqedonisë George Ivanov, me një gur rubini mbi pllakë mermeri, dhe ish-kryeministri i Kosovës Hashim Thaçi, me një hartë të Kosovës në gur. Trajko Veljanovski, atëherë kryetar i Parlamentit maqedonas, ka dhuruar dy maska të përshkruara si prej ari, ndërsa princi saudit Sultan bin Salman bin Abdulaziz Al Saud një shpatë të vogël ceremoniale.
Regjistrat e periudhave 2018-2020, 2021-2022 dhe 2022-2026 përmbajnë qindra objekte të tjera, por pa emrat e dhuruesve. Mes tyre ka një orë dekorative të përshkruar si “St. Michael Over the Devil”, një shpatë e vogël ari, një objekt argjendi me Katedralen e Bukureshtit, si dhe këpucë e top futbolli në filigran ari.
Inventari përfshin edhe një replikë të një pikture të Gustav Klimt, një statujë Pegasi, një ikonë të Shën Marisë, koleksione monedhash dhe medalje përkujtimore. Ka gjithashtu një gravurë në bakër të Ali Pashë Tepelenës, një portret të Hashim Thaçit, një pikturë të anijes “Vlora” me emigrantë dhe punime me Skënderbeun.
Përveç artit dhe objekteve ceremoniale, regjistrat përmbajnë dhjetëra libra, albume fotografike e suvenire. Një pjesë e koleksionit ruhet në muzeun e dhuratave në selinë e qeverisë, të cilin Rama e përmendi në shtator.
