Biznesmeni Ram Geci, pronar i kompanisë së ndërtimit “Geci” shpk, figuron mes të pandehurve në dosjen e SPAK për korrupsion në tenderat e mëdhenj publikë. Në të njëjtën dosje akuzohen mbi 30 zyrtarë publikë dhe biznesmenë. Prokuroria e Posaçme e akuzon Gecin për falsifikim dokumentesh, disa herë, në kuadër të manipulimit të procedurave të prokurimit.
Nëse GJKKO e pranon akuzën, Geci rrezikon nga 6 muaj deri në 4 vite burg, sipas nenit 186 të Kodit Penal për falsifikimin e dokumenteve.
Sipas dosjes së SPAK, tenderat i fitonte me pazar në tavolinë, madje edhe me porosi të kryeministrit Edi Rama, ndërsa ministritë e linjës dhe drejtoritë përgatisnin letrat. Kompania Geci shpk, e themeluar në vitin 1994, përmes së cilës dyshohet se janë finalizuar këto përfitime, ka marrë në vitet e fundit rreth 90 milionë euro fonde publike, vetëm ose në bashkëpunim me të tjerë. Oferta fituese ishte zakonisht pothuajse sa fondi limit. Vetëm në 5 vitet e fundit, kompania ka përfituar mbi 75 milionë euro nga buxheti i shtetit, nga tendera e kontrata me Autoritetin Rrugor Shqiptar, Fondin Shqiptar të Zhvillimit, Bashkinë e Tiranës e institucione të tjera.
Si shembull, dosja përmend tenderin 12 milionë euro për “Ndërtim rruga Porto Romano Durrës, Loti 3”. Më 24 gusht 2021, zv/kryeministrja Belinda Balluku i shkroi kreut të ARRSH-së se kryeministri Rama i kishte kërkuar të takonte Ram Gecin, i cili synonte këtë tender. Evis Berberi iu përgjigj se Geci e kishte takuar atë ditë kryeministrin, informacion që e kishte marrë nga vetë Geci gjatë një xhiroje në kantierin e Unazës së Madhe.
Tre javë më vonë, më 16 shtator 2021, ARRSH nisi procedurën e prokurimit për “Ndërtim rruga Porto Romano Durrës, Loti 3 (vazhdimi)”. Më 16 nëntor 2021 shpalli fituese kompaninë Geci shpk, me ofertë pothuajse sa fondi limit. Sipas dosjes, fituesi ishte caktuar paraprakisht dhe ofertat më të ulëta u skualifikuan.
Në dosje akuzohen, ndër të tjerë, Belinda Balluku për shkelje të barazisë në 9 tendera, korrupsion, pastrim parash dhe mosdeklarim pasurie, si dhe Evis Berberi për shkelje në 9 tendera. Paqsor Buzi dhe Artan Sako akuzohen, si Geci, për falsifikim dokumentesh disa herë. Të pandehurit mbeten të pafajshëm deri në vendimin përfundimtar të gjykatës.
