Tenderi i OSSH për shërbimin e sigurisë në Elbasan, me fond limit rreth 2 milionë euro, është fituar nga bashkimi i operatorëve “Juer Security” dhe “Myrto Security”. Kompania “Myrto Security” është ajo që mbeti pa licencë në qershor 2026, pas incidenteve me protestuesit në Zvërnec të Vlorës.
Pak ditë më parë, Drejtoria Rajonale e Operatorit të Sistemit të Shpërndarjes në Elbasan njoftoi lidhjen e kontratës. Ajo ka për objekt ruajtjen fizike të ndërtesave, aseteve, njerëzve dhe pronave të OSSH-së në Drejtorinë Rajonale Elbasan dhe të Furnizuesit të Shërbimit Universal në këtë qytet.
Procedura u shpall në gusht të këtij viti, me fond limit 184.735.036 lekë të reja, afërsisht 1.99 milionë euro sipas kursit të asaj kohe. Një nga kriteret kryesore të kualifikimit ishte posedimi i licencës së tipit 1.3 A, mbi të cilën bazohet aktiviteti i shoqërive private të sigurisë. Me këtë licencë, Drejtori i Përgjithshëm i Policisë i lejon këto shoqëri të kryejnë shërbimin e ruajtjes së pronave, institucioneve, ngjarjeve ose individëve.
Më 30 maj 2026, një grup qytetarësh nga Vlora protestoi kundër shkatërrimit të zonës së Zvërnecit në kuadër të një projekti turistik, në të cilin përfshihet edhe Jared Kushner, dhëndri i presidentit amerikan Donald Trump. Banorët kundërshtonin bllokimin e aksesit drejt bregdetit dhe kishin pretendime për pronësinë reale të truallit ku parashikohet resorti.
Përballë protestuesve, brenda një hapësire të rrethuar me tela, ndodheshin forcat e sigurisë private “Major Security” dhe “Myrto Security”, të kontraktuara nga sipërmarrësi i punimeve. Pika më e tensionuar e përplasjes ishte tërheqja me forcë e qytetarit Eduard Subashi për më shumë se 100 metra nga punonjës të kompanive të sigurisë. Ngjarja nxiti një protestë disamujore, të quajtur “Revolucioni Flamingo”, sipas shpendëve të rrallë që rrezikohen nga projekti.
Një ditë më pas, Policia e Shtetit njoftoi heqjen e licencës për të dyja kompanitë. Në njoftimin e 1 qershorit 2026 thuhej se, në përfundim të hetimeve administrative, për shkeljet e konstatuara, me vendim të Drejtorit të Përgjithshëm të Policisë iu hoq licenca “Myrto Security 1.3A” dhe “Major Security”.
Sipas gjetjeve të Policisë, “Myrto Security 1.3A” nuk kishte marrë masa për sigurinë e objektit dhe nuk kishte zbatuar rregullat e hyrjes e daljes së personave e mjeteve. Nuk administrohej lista e personave dhe e mjeteve që lejoheshin të hynin, ndaj më 30 maj 2026 brenda rrethimit u lejuan persona të paidentifikuar dhe të panjohur për personelin.
Njoftimi shtonte se këta persona kishin ndërhyrë pa asnjë atribut ligjor, kishin goditur e tërhequr me forcë një pjesëmarrës në protestë dhe i kishin shkaktuar lëndime trupore. Ata kishin reaguar ndaj protestuesve edhe me gurë dhe sende të tjera nga rrethimi, ndërsa punonjësit e “Myrto Security 1.3A” nuk ndërmorën asnjë veprim parandalues apo për largimin e tyre.
Pavarësisht kësaj, kompania rezulton të ketë marrë pjesë në tenderin e shpallur dy muaj më vonë, në gusht 2026, dhe të jetë shpallur fituese, duke deklaruar se disponon licencën 1.3 A.
