Policia në Kotor, në Mal të Zi, ka ndaluar një autobus dhe një furgon me nxënës të gjimnazit “Naim Frashëri” të Durrësit, që ndodheshin në një udhëtim turistik. Në mjete ishin nxënës të mitur dhe mësues shoqërues, të cilët janë mbajtur për disa orë në ambientet e policisë.
Në fillim, familjarëve nuk u ishte komunikuar shkaku i ndalimit. Ata kërkuan ndihmën e Ambasadës Shqiptare në Mal të Zi dhe të institucioneve arsimore në Durrës.
Më vonë u mor një informacion tjetër, sipas të cilit ndalimi dyshohet se lidhet me një incident me disa nxënës. Sipas këtij pretendimi, tre prej tyre kanë bërë gjestin e shqiponjës me duar, ndërsa një nxënës tjetër dyshohet se është përfshirë në një përplasje me një grua malazeze, e cila më pas ka lajmëruar policinë.
Sipas informacioneve të fundit, pjesa më e madhe e grupit ka dalë nga komisariati dhe është nisur drejt hotelit. Katër nxënës dhe një mësuese raportohet se vazhdojnë të jenë në ambientet e policisë në Kotor.
Deri tani nuk ka konfirmim zyrtar për rrethanat e incidentit dhe arsyen e saktë të ndalimit. Pritet reagim nga Ambasada Shqiptare në Mal të Zi, Ministria për Evropën dhe Punët e Jashtme, autoritetet policore malazeze dhe Drejtoria Arsimore në Durrës, për të sqaruar pse nxënësit e mitur janë mbajtur kaq gjatë.
