Takimi i ministrit të Drejtësisë, Toni Gogu, me Erion Veliajn në burgun e Fierit ka marrë një dimension të ri, pasi po qarkullon pretendimi se biseda mes tyre është regjistruar nga shërbime të huaja. Sipas këtij informacioni, shërbimet kishin nën vëzhgim një të burgosur tjetër në të njëjtin institucion.
Regjistrimi nuk lidhet domosdoshmërisht me një pajisje të vendosur posaçërisht për takimin Gogu–Veliaj, por me një operacion monitorimi ndaj një personi tjetër të privuar nga liria. Dyshohet se biseda e ministrit me kryebashkiakun mund të jetë kapur gjatë përgjimit të komunikimeve apo të ambientit ku ndodhej personi nën vëzhgim.
Nuk ka konfirmim zyrtar për ekzistencën e regjistrimit, për shërbimin që pretendohet ta ketë realizuar apo për përmbajtjen e mundshme audio. Asnjë institucion nuk ka bërë publik dokument që i vërteton këto pretendime.
Një tjetër pretendim lidhet me ngjarjet pas reagimit publik të Gogut. Sipas informacionit që qarkullon, ai është kontaktuar drejtpërdrejt nga persona të lidhur me SPAK, të cilët i kanë kërkuar të paraqitej për sqarime. Ministri pretendohet të ketë kundërshtuar, duke argumentuar se vizitën e kishte bërë vetë publike.
“Por unë e deklarova vetë”, mësohet se ka qenë përgjigjja e Gogut. Pala tjetër pretendohet t’i ketë thënë: “Pikërisht”. Nëse konfirmohet, ky shkëmbim do të nënkuptonte se interesi i SPAK nuk lidhej me faktin nëse ministri kishte qenë në burg, por me rrethanat e vizitës dhe përmbajtjen e bisedës me Veliajn. SPAK nuk ka bërë asnjë njoftim zyrtar për telefonatën, kërkesën për paraqitje apo ndonjë veprim procedural ndaj ministrit.
Vetë Gogu ka pranuar publikisht se e takoi Veliajn të premten, më 30 tetor, në burgun e Fierit. Ai e cilësoi vizitën pjesë të përgjegjësive institucionale, me qëllim që të njihej me kushtet e trajtimit të kryebashkiakut dhe të dëgjonte shqetësimet e avokatit të tij, Plarent Ndreca. Ministri mohoi kategorikisht se kishte përcjellë ultimatum apo kërcënim në emër të kryeministrit Edi Rama dhe tha se me Veliajn ka miqësi të hershme.
Avokati Ndreca pretendon se gjatë takimit ministri i kërkoi Veliajt të dorëzonte mandatin, t’ua delegonte kompetencat personave të zgjedhur nga Rama dhe të hiqte dorë nga mbrojtja ligjore. Sipas këtij versioni, në rast refuzimi, ai kërcënohej me transferim në një burg tjetër dhe me hetime të reja nga SPAK.
Përplasja mes dy versioneve e ka kthyer takimin në çështje me interes politik e institucional. Nëse ekziston një regjistrim, ai mund të sqarojë çfarë u diskutua në fakt në Fier dhe nëse mesazhi që i atribuohet kryeministrit është përcjellë. Për momentin, regjistrimi nga shërbime të huaja dhe telefonata e pretenduar nga SPAK mbeten të pakonfirmuara zyrtarisht.
