Studentët që protestojnë kundër qeverisë marshuan të hënën pasdite drejt Kryeministrisë, në bulevardin “Dëshmorët e Kombit”, ku thirrën slogane kundër kryeministrit Edi Rama dhe zëvendëskryeministres Belinda Balluku. Protesta vazhdoi pasi nisi më herët nga institucionet arsimore.
Në marshim morën pjesë të rinj nga fakultete të ndryshme. Përballë selisë së qeverisë, ata përsëritën thirrjen “Arrestoni Ramën, arrestoni Ballukun!”, duke e drejtuar protestën edhe te përgjegjësia politike e drejtuesve të qeverisë.
Kur mbërritën para godinës, protestuesit u ndalën në mes të bulevardit dhe vijuan të shprehin kundërshtimin ndaj kryeministrit dhe ndaj mënyrës si kanë reaguar forcat e rendit. Të rinjtë thirrën slogane edhe kundër Policisë së Shtetit, të cilën e quajtën “polici e krimit”.
Ardhja e protestës te Kryeministria shënon një përshkallëzim të mëtejshëm të presionit të studentëve ndaj qeverisë. Kërkesat e tyre dhe pakënaqësia për trajtimin e protestuesve vazhdojnë ta mbajnë të tensionuar situatën politike.
