Holta Zaçaj, ish-anëtare e Gjykatës Kushtetuese dhe tashmë zv. guvernatore e Parë e Bankës së Shqipërisë, ka deklaruar se neni 72 i projektligjit për Bankën e Shqipërisë nuk jep imunitet, por është dispozitë garantuese. Sipas saj, guvernatori nuk mbrohet si person, por për të ruajtur pavarësinë e institucionit.
Qeveria ka depozituar në Kuvend si nismë të saj projektligjin e propozuar nga Banka e Shqipërisë. Ai kufizon arrestimin e guvernatorit dhe masat e tjera shtrënguese, duke ia lënë vendimin Kuvendit. Teksti ka hapur debat të fortë për ndikimin që mund të ketë në hetimet penale.
Neni 72 parashikon mbrojtje nga arresti me burg ose në shtëpi, si dhe nga çdo masë tjetër shtrënguese, nëse guvernatori akuzohet për vepra penale të lidhura me ushtrimin e detyrës. Qëllimi është të ruhet pavarësia e institucionit dhe të shmangen presionet mbi të.
“Ne në nenin 72 kemi propozuar që arresti i guvernatorit, nëse kërkohet, duhet të verifikojë nëse ka prova të qenësishme dhe nëse vepra lidhet me detyrën”, tha Zaçaj. Ajo shtoi se guvernatori mbrohet që të funksionojë i pavarur, pa frikën se një organ i pushtetit tjetër mund ta pengojë në ushtrimin e detyrës. “Ne mbrojmë institucionin duke mbrojtur guvernatorin”, tha ajo.
Zaçaj dha edhe një shembull: nëse guvernatori shkakton një aksident dhe vret dikë në rrugë, arrestohet. Nëse akuza është për shpërdorim detyre, çështja shkon në Kuvend, që të përcaktojë nëse ka lidhje me ushtrimin e detyrës. Nëse ka lidhje, sipas saj, ai nuk mund të arrestohet.
Praktikisht, Kuvendi, njësoj si për deputetët, do të japë ose jo lejen për arrestim, duke vlerësuar lidhjen e veprës me detyrën. Sipas projektligjit, nëse guvernatori akuzohet për korrupsion dhe Kuvendi çmon se vepra lidhet me funksionin e tij, arrestimi nuk mund të kryhet.
