Një filial i “Raiffeisen Bank” në zonën e Komunës së Parisit në Tiranë u grabit në mëngjesin e së hënës. Policia ka rrethuar zonën dhe ka nisur veprimet për të kapur autorin e grabitjes.
Sipas informacioneve paraprake, një person i maskuar dhe i armatosur hyri në ambientet e bankës dhe i kërcënoi punonjësit me armë zjarri. Pasi mori një shumë parash, ai ikën në një drejtim të paditur.
Pamjet e publikuara pas ngjarjes tregojnë praninë e forcave të Policisë përreth filialit, ku u kryen veprimet e para hetimore.
Po sipas informacioneve paraprake, policia ka arritur të identifikojë personin e dyshuar dhe po punon për ta lokalizuar e arrestuar.
Deri tani nuk ka njoftim zyrtar për shumën e marrë. Gjithashtu mbetet e paqartë nëse ka pasur persona të lënduar gjatë incidentit. Hetimet vijojnë për të dokumentuar plotësisht ngjarjen dhe për të sqaruar rrethanat.
