Drejtuesi i Drejtorisë së Policisë Kriminale në Serbi, Marko Kriçak, u arrestua mëngjesin e së dielës me urdhër të Prokurorisë së Lartë Publike në Beograd. Ai dyshohet për shpërdorim detyre, ndërsa deri dje radhitej mes figurave policore që presidenti Aleksandar Vuçiç i kishte vlerësuar publikisht.
Arrestimi lidhet me hetimin për vrasjen e Aleksandar Neshoviçit, i njohur si Baja, i cili u vra në restorantin “27” në zonën e Senjakut në Beograd. Sipas raportimeve të mediave serbe, Kriçak dyshohet se ka ndërhyrë në hetim, duke falsifikuar prova dhe duke bërë presion mbi dëshmitarët e të akuzuarit, për ta çuar hetimin drejt një versioni të paracaktuar.
Procedimi nisi pas një kallëzimi penal të avokatit të Veselin Miliçit, ndihmësdrejtor i Policisë së Serbisë.
Kriçak e mori drejtimin e Policisë Kriminale në fund të dhjetorit 2025. Më parë ai drejtonte Njësinë për Sigurinë e Personave dhe Objekteve të Caktuara (JZO), e cila është përmendur shpesh në raportime për përdorim të dyshuar të dhunës ndaj protestuesve. Karriera e tij nisi në Agjencinë e Sigurisë dhe Informacionit (BIA). Pas emërimit të Bratislav Gashiçit ministër i Policisë, ai u bë zëvendëskomandant i JZO-së, kurse në vitin 2023 u vendos në krye të saj.
Sipas “Danas”, ai kishte kaluar nga BIA në polici pa trajnimin bazë policor, gjë që ligji serb e lejon. Politikanë të opozitës dhe gazetarë kishin pretenduar se para BIA-s kishte punuar si shitës automjetesh, pretendim që Ministria e Brendshme e hodhi poshtë.
Emri i tij është përmendur edhe në episode të ndërhyrjeve policore gjatë protestave studentore. Studentja Nikolina Sinxheliç ka deklaruar publikisht se Kriçak e kishte kërcënuar me përdhunim dhe e kishte goditur me shuplakë në garazhin e ndërtesës së Qeverisë. Ajo paraqiti kallëzim penal, por sipas “Danas” çështja nuk pati përparim të madh, ndërsa Kriçak ngriti padi private kundër saj. Një video tjetër e tregon atë të dyshuar se ushtron dhunë ndaj një studenti të ndaluar në Jagodinë, për ta detyruar të japë deklaratë.
Në fund të vitit 2025, kur u emërua në krye të Policisë Kriminale, nën autoritetin e tij kaloi edhe Shërbimi për Luftën kundër Krimit të Organizuar. Vuçiç e kishte përmendur disa herë pozitivisht dhe kishte dekoruar si atë, ashtu edhe njësinë që drejtonte më parë.
Arrestimi dhe dyshimet ndaj tij nuk përbëjnë vendim fajësie, ndërsa përgjegjësinë penale do ta përcaktojnë organet e drejtësisë.
