Avokati Plarent Ndreca ka denoncuar se për herë të dytë i është penguar takimi me të mbrojturin e tij, kryebashkiakun e Tiranës Erion Veliaj, i cili mbahet në paraburgim në burgun e Fierit. Ndreca i ka dërguar një shkresë drejtuesit të institucionit, ku pretendon se i është refuzuar hyrja në ambientet e burgut.
Sipas tij, ky veprim përbën shkelje të së drejtës për mbrojtje dhe pengim të ushtrimit të detyrës së tij profesionale. Ai i referohet nenit 51 të ligjit, që sipas tij i garanton avokatit të drejtën për t’u takuar me klientin në çdo kohë.
Ndreca paralajmëron se, nëse situata nuk zgjidhet, do t’i drejtohet oficerit të policisë gjyqësore për të depozituar kallëzim penal për shpërdorim detyre ndaj punonjësve që, sipas tij, mbajnë përgjegjësi për pengimin. Ai i kërkon drejtorit të burgut të ndërhyjë menjëherë për të garantuar zbatimin e ligjit.
Në shkresë avokati thekson se nuk ka pasur qëllim ta përshkallëzojë apo ta bëjë publike çështjen, por se përsëritja e pengesës e detyron të ndjekë rrugën ligjore.
“Respektimi i ligjit nuk është çështje vullneti apo diskrecioni të punonjësve të institucionit. Është detyrim!”
Në letër ai shton se pengimi i mbrojtësit cenon drejtpërdrejt të drejtat kushtetuese të klientit të tij dhe sjell përgjegjësi penale për personat përgjegjës.