Një denoncim i ri, i adresuar strukturave të antikorrupsionit pranë Kryeministrisë, Drejtorisë së Përgjithshme të Doganave, Ministrisë së Financave dhe Prokurorisë, akuzon rrjetin e kompanive të lidhura me biznesmenin e Devollit, Mario Berberi, për evazion fiskal, kontrabandë dhe falsifikim faturash importi. Bëhet fjalë për akuza dhe dyshime që nuk janë provuar.
Në dokument përmenden kompanitë Best Price, Lele dhe Kleo, subjekti Nurce, Shpëtim Ahmetaj dhe furnitori grek “Astor Hellas”, me seli në Selanik. Transaksionet e tyre përfshihen në kërkesën për hetim.
Sipas autorëve të letrës, mallrat e blera në Greqi deklarohen në doganat shqiptare me vlera artificialisht të ulëta, me fatura të ndryshuara ose dokumente që nuk pasqyrojnë sasitë reale. Ata pretendojnë se në këtë mekanizëm mund të jenë përfshirë edhe punonjës të administratës doganore. Denoncimi kërkon zbardhjen e skemës, duke lidhur importuesit, furnitorët e huaj dhe zyrtarët përgjegjës për zhdoganimin.
Berberi Company, që Berberi e zotëron drejtpërdrejt, është regjistruar në vitin 2017 dhe ushtron aktivitet në import, eksport, transport e tregti, me seli në aksin Bilisht-Kapshticë. Best Price, e themeluar në shtator 2024, figuron në pronësi të Robert Kadriut. Sipas informacioneve investigative, Kadriu është prestanome, ndërsa Berberi kontrollon furnizimet, magazinën dhe shpërndarjen. Atij i atribuohet edhe financimi i një magazine në zonën Kamëz-Vorë, me investim të pretenduar mbi 2 milionë euro.
Lele, e themeluar në prill 2024, dhe Kleo, e krijuar në janar 2025, figurojnë në emër të Kleo Kaprellit. Ato kanë të njëjtën adresë në Bilisht, të njëjtin numër telefoni dhe aktivitet të ngjashëm. Regjistrimi në emër të Kaprellit është fakt dokumentar, ndërsa kontrolli faktik i Berberit mbi to mbetet pjesë e informacioneve investigative.
Një tjetër pretendim lidhet me pagesat ndaj agjentëve doganorë. Dyshohet se disa prej tyre janë përfshirë në një sistem listëpagesash mujore të Berberit, në këmbim të lehtësimit të aktivitetit të tij në kufi. Sipas akuzës, pagesat nuk lidheshin me një ngarkesë të vetme, por me mbrojtje të vazhdueshme nga kontrollet. Informacione të mëparshme flisnin për pagesa të paligjshme, të njohura si “kafe”, që pretendohej se u shpërndaheshin drejtuesve lokalë të Kapshticës dhe zyrtarëve në Tiranë. Në qendër të tyre përmendej Dritan Çekani, ish-drejtues i Degës Doganore të Kapshticës, marrëdhënia e të cilit me Berberin përshkruhej si bashkëpunim i dyshuar financiar.
Më 26 korrik 2018, Berberi u arrestua nga Policia e Korçës bashkë me doganierët Floben Guxho, Klodian Nastimi dhe Renato Molla. Dy automjete u kapën me pije energjike dhe mallra të dyshuara si kontrabandë. Sipas Policisë, Berberi ishte porositësi i dyshuar i ngarkesës, ndërsa doganierët dyshohej se e kishin lejuar kalimin pa kontroll.
Në shkurt 2025, një operacion tjetër policor në të njëjtën pikë kufitare sekuestroi 2.573 artikuj veshjesh. U proceduan penalisht për shpërdorim detyre drejtori i doganës Dritan Çekani, përgjegjësi i turnit Vangjush Nole dhe doganierët Klodian Palloi e Renato Molla. Këto procedime nuk provojnë se personat e përmendur kanë marrë pagesa nga Berberi.
Për sa i përket veprimtarisë financiare, Berberi Company kishte rreth 8.7 milionë lekë xhiro në vitin 2018, mbi 90 milionë lekë në 2023 dhe rreth 85.7 milionë lekë në 2024. Gjatë viteve 2023–2025 ka fituar katër procedura prokurimi nga Bashkia Devoll, me oferta deri në 14.28 milionë lekë pa TVSH. Në nëntor 2024 u shpall fituese edhe për dhënien me qira të një trualli prej 3.150 metrash katrorë, kundrejt 95 mijë lekëve në muaj, pagesa që shfaqen në regjistrin e shpenzimeve publike edhe në 2026.