Policia e Shtetit ka penguar deputetët Tedi Blushi i Partisë së Lirisë dhe Belind Këlliçi i Partisë Demokratike të kalonin drejt bulevardit “Dëshmorët e Kombit”, gjatë protestës përpara Kryeministrisë në Tiranë.
Sipas Publik Media, kalimi në këtë aks u bllokua nga një kordon efektivësh. Deputetët kërkuan të vazhdonin lëvizjen, por policia e mbajti rrugën të mbyllur, gjë që shkaktoi tension dhe përplasje verbale.
Dy tubime paralele
Protesta është thirrur nga Partia Demokratike, në mbështetje të revoltës studentore dhe kundër qeverisë së Edi Ramës. Paralelisht zhvillohet edhe një tubim i studentëve para Ministrisë së Arsimit.
Përpara godinës së qeverisë është rritur prania e forcave të policisë, të cilat kanë marrë masa për kontrollin e perimetrit të Kryeministrisë.
Situata në terren vijon dhe mbetet e hapur nëse tensionet do të shtohen apo do të qetësohen gjatë protestës.